لیکنه: ویس احمد ابراهيم / تعلیم الاسلام ویب پاڼه
د سورة الذاريات لنډه پېژندنه
سورة الذاريات د تلاوت او مصحف په اعتبار ۵۱ سورة دئ، چي د هجرت ترمخه په مکة معظمة کي نازل سوی دئ.
سورة الذاريات ۶۰ آية دئ او ۳ رکوع لري.
د دې سورة نوم د اول آية څخه اخستل سوی دئ، چي الله تعالی فرمايي: (وَالذَّارِيَاتِ ذَرْوًا)
ژباړه: او (قسم) په هغو بادونو چي پاښونکي وي.
ذاريات - پاښونکي بادونه (هغه باد چي تېز او غورځونکي وي.)
په سورة الذاريات کي لاندي موضوعات ذکر سوي دي
۱- الله تعالی قسم کوي په مختلفو شيانو سره، چي د قيامت ورځ راتلونکې ده.
۲- هر چا ته به خپل د عقيدې او اعمالو جزا او سزا ورکول کيږي.
۳- د سيدنا ابراهيم (عليه السلام) قصه چي ملائکي د زوی د زيري سره ور ته راغلې، او همدغه ملائکي د لوط (عليه السلام) د قوم د خلګو د هلاکت له پاره هم را استول سوي وې.
۴- په سابقه او تېر سوي قومونو کښي نښانې پرتې دي د هغه کسانو له پاره چي د عذابه بېريږي.
۵- د سيدنا موسی (عليه السلام) او د فرعون قصه او د عاد قوم چي الله (تبارک و تعالی) د باد په واسطه هلاک کړل. د ثمود قوم او د سيدنا نوح (عليه السلام) قوم چي الله تعالی دوی د ګناه له وجي تباه کړل.
۶- الله (عزوجل) آسمانونه او مځکي پيدا کړي دي، او هر شي ئې جوړه جوړه پيدا کړی دئ. نو د الله تعالی و طرف ته مخه کړئ.
۷- يو د بل سره مذاکره (يعني يادونه او تعليم) وکړئ، بېشکه چي دا مؤمينانو ته ګټه رسوي.
۸- الله (سبحان و تعالی) پېريان او انسانان د عبادت له پاره پيدا کړي دي او روزي رسونکی هم الله رب العزة دئ.
په ځينو نورو تفاسيرو کي د سورة الذاريات موضوعات په لاندي ډول ذکر سوي دي، چي الله (رب العزة) فرمايي:
۱- ورځ د اخرت راتلونکې ده.
۲- د مجرمانو او کفارو له پاره د اور عذاب راتلونکی دئ.
۳- مؤمينان او متقيان به په جنت کي وي.
۴- د سيدنا ابراهيم (عليه السلام) واقعه.
۵- د حضرت موسی (عليه السلام) او د فرعون واقعه.
۶- د عاد، ثمود او د نوح (عليه السلام) د قوم بيان.
۷- د الله تعالی ربوبيت او الوهيت، د هر څه خالق الله (عزوجل) دئ.
www.taleemulislam.net
