سورة الأنفال

لیکنه: ویس احمد ابراهيم / تعلیم الاسلام ویب پاڼه

سورة الأنفال د مصحف او تلاوت په اعتبار ۸ سورة دئ، چي د هجرت وروسته په مدينة منورة کي نازل سوی دئ.

سورة الأنفال ۷۵ آيته او ۱۰ رکوع لري.

د دې سورة نوم د اول آية څخه اخستل سوی دئ، چي الله تعالی فرمايي: (يَسْـَٔلُونَكَ عَنِ ٱلْأَنفَالِ ۖ قُلِ ٱلْأَنفَالُ لِلَّهِ وَٱلرَّسُولِ ۖ فَٱتَّقُوا۟ ٱللَّهَ وَأَصْلِحُوا۟ ذَاتَ بَيْنِكُمْ ۖ وَأَطِيعُوا۟ ٱللَّهَ وَرَسُولَهُۥٓ إِن كُنتُم مُّؤْمِنِينَ)

انفال په معنی د غنيمت دئ، هغه د غنيمت مال چي مسلمانانو د بدر په غزا کي د کفارو څخه لاسته راوړئ.

سورة الأنفال د مسلمانانو او د مکې د قريشو تر منځ اولينه جګړه (يعني د بدر د غزا) وروسته نازل سو.

په سورة الأنفال کي لاندي موضوعات ذکر سوي دي:

۱-  په جهاد کښي د غنيمت موضوع؛

۲-  د بدر د غزا بيان او د زرو (۱۰۰۰) په تعداد د ملائکو کمک او همکاري د مسلمانانو سره؛

۳-  د هجرت تر مخه د قريشو له خوا د رسول الله صلی الله علیه وسلم د قتل پلان؛

۴-  د غنيمت د مال وېشل او پنځمه حصه د مال د الله او د هغه د رسول لپاره ده؛

۵-  الله تعالی شل صابر کسان پر دوه سوو کافرانو غالبه کوي او ۱۰۰ صابره کسان پر ۱۰۰۰ کافرانو غالبه کوي؛

۶-  د الله (تبارک و تعالی) له خوا ټولو مؤمينانو ته اجر عظيم سته، هغه که مهاجرين دي، که انصار او که د مجاهدينو سره مرسته کوونکي.

www.taleemulislam.net