لیکنه: ویس احمد ابراهيم / تعلیم الاسلام ویب پاڼه

د سورة الفتح لنډه پېژندنه

سورة الفتح - د مصحف او تلاوت په اعتبار ۴۸ سورة دئ، چي د هجرت څخه وروسته نازل سوی دئ، نو ځکه مديني سورة ور ته ويل کېږي.

سورة الفتح ۲۹ آية دئ او ۴ رکوع لري.

د دې سورة نوم د اول آية کريمې څخه اخستل سوی دئ چي الله (عزوجل) فرمايي: (إِنَّا فَتَحْنَا لَكَ فَتْحًا مُبِينًا)

ژباړه: يقيناً چي موږ تاسو ته ښکاره فتح (او کاميابي) درکړه.

«فتح» کاميابي او برلاسۍ ته ويل کېږي.

په سورة الفتح کي لاندي موضوعات ذکر سوي دي

۱-  الله (رب العزة) و رسول الله ﷺ ته ښکاره د فتح خبر ورکوي.

۲-  د رسول الله ﷺ سره بيعت کول، د الله تعالی سره بيعت کول دي.

۳-  د آسمانونو او مځکي لښکر او فوج د الله دئ او مؤمينانو نارينه و ښځو ته الله تعالی ښه بدله ورکوي او کفارو ته به د جهنم عذاب وي.

۴-  الله تعالی رسول اکرم ﷺ د شاهد، زيری ورکونکی او بېرونکی په توګه را استولی دئ، تر څو انسانان ايمان پر راوړي او همايه ئې وکي، اکرام او عزت ئې وکي او شپه و ورځ د الله تعالی پاکي بيان کي.

۵-  د رسول الله ﷺ خوب چي په مکة معظمة کي حج کوي، هغه به رښتيا سي.

په ځينو نورو تفاسيرو کي د سورة الفتح په باب داسي راغلي دي چي الله (رب العزة) په سورة الفتح کي لاندي موضوعات ذکر کړي دي:

- الله (عزوجل) هغه ذات دئ چي د مؤمينانو پر زړونو ئې سکينه (يعني ډاډ) نازل کئ، تر څو ايمان ئې نور هم زيات سي. د آسمانونو او مځکي لښکر د الله تعالی په واک کي دي.

- الله تعالی به مؤمينان و جنت ته داخل کي، ګناهونه به ئې ور معاف کي.

- الله تعالی به مشرکين او منافقين په عذاب اخته کي.

- يقيناً (اې نبي) چي موږ ته شاهد، زېری ورکوونکی او بېرونکی را استولی ئې.

www.taleemulislam.net