لیکنه: ویس احمد ابراهيم / تعلیم الاسلام ویب پاڼه

د سورة سبا لنډه پېژندنه 

سورة سبا د مصحف او تلاوت په اعتبار ۳۴ سورة دئ، چي د هجرت څخه د مخه په مکة معظمة کي پر رسول اکرم صلی الله علیم وسلم نازل سوی دئ.

سورة سبا ۵۴ آية او ۶ رکوع لري.

د دې مبارک سورة نوم د ۱۵ آية کريمې څخه اخستل سوی دئ. الله تعالی فرمايي: (لَقَدْ كَانَ لِسَبَإٍ فِي مَسْكَنِهِمْ آيَةٌ ۖ …)

په سورة سبا کي لاندي موضوعات ذکر سوي دي

۱-  د الله تعالی ربوبيت او الوهيت؛ 

۲-  ورځ د اخرت راتلونکې ده تر څو مؤمينانو او کفارو ته خپله بدله ورکول سي؛

۳-  غرونو او مرغانو به د حضرت داود (عليه السلام) سره د الله تعالی ثناء او صفت وايه او د ده مبارک په لاس کي به اوسپنه سره ويلي کېده؛

۴-  الله (رب العزة) و حضرت سليمان (عليه السلام) ته جنيات (پېريان) او باد مسخر او تابع کړي وو؛

۵-  د سبا د قوم قصه؛

۶-  د الله تعالی په وړاندي د هيچا شفاعت نه منل کيږي، خو د هغه چا چي الله (عزوجل) ور ته اجازه ورکي؛

۷-  رسول الله صلی الله علیم وسلم د ټولو انسانانو له پاره استازی او پيغمبر دئ؛

۸-  مال، شتمني او اولادونه د امتحان ذريعه ده؛

۹-  د انسان د هري صدقې او خيرات بدله الله (رب العزة) ورکوي؛ 

۱۰-  حق او رښتيا راغلل او درواغ د منځه ولاړه؛

په سورة سباء کي د حضرت سليمان (عليه السلام) قصه ذکر سوې ده، چي الله (عزوجل) فرمايي:

سليمان (عليه السلام) ته مو باد (او هوا) په واک کي ورکړې ول، د يوې مياشتي سفر به ئې د ورځي له خوا طی کوئ، او د يوې بلي مياشتي سفر به ئې د ماښام له خوا او د ده مبارک (عليه السلام) له پاره مو د ميسو ویاله بهيوله او د جنياتو څخه مو د ده له پاره په کار ګمارلي وه، (يعني جنيات د سليمان (عليه السلام) خادمان ول.) او د حضرت سليمان (عليه السلام) له پاره به ئې محرابونه، ذخيرې او غټ ديګونه جوړول.

نو الله (رب العزة) ورته وفرمايل: اې د حضرت داود (عليه السلام) آل (يعني اولاد او کورنی ئې)، کار وکئ په شکر اداء کولو سره او ډېر لږ زما د بنده ګانو څخه شکر ګزاره دي.

www.taleemulislam.net