د (نبوي سيرت) نورې ليکنې
تازه سرليکونه
بېلابېلې ليکنې
مختصر نبوي سیرت (۹)
مختصر نبوي سیرت
(نهمه برخه)
لیکوال: شیخ موسی بن راشد عازمي
ترجمه: سلطان محمود صلاح/تعلیم السلام ویب پاڼه
مدینې ته هجرت
o رسول الله صلی الله علیه وسلم خپلو اصحابو ته مدینې ته د هجرت د وجوب امر وکړ او لارښوونه یې ورته وکړه چي خپلو انصارو وروڼو ته ورکډه شي.
o رسول الله صلی الله علیه وسلم فرمایلي: «وَأُمِرْتُ بِقَرْيَةٍ تَأْكُلُ الْقُرَى، يَقُولُونَ يَثْرِبَ وَهِيَ الْمَدِينَةُ تَنْفِي النَّاسَ كَمَا يَنْفِي الْكِيرُ خَبَثَ الْحَدِيدِ. (مُتَّفَقٌ عَلَيْهِ). هغه کلي ته د هجرت امر راته شوی دی، چي پر نورو سیمو او کلیو به برلاسي مومي (نور ښارونه او کلي به فتح او لاندي کړي)، د هجرت دا کلی خلک د یثرب په نوم یادوي، خو غوره نوم یې مدینه دی، مدینه ناپاک او خبیث خلک له ځانه داسي شړي لکه د آهنګر (پښ) کوره چي د اوسپني کوټه برخه له منځه وړي.
o اصحاب رضي الله عنهم ډلي - ډلي په پټه؛ پلي او سپاره له مکې نه د مدینې په لور لاړل، خو رسول الله صلی الله علیه وسلم لا د هجرت په اړه د الله تعالی امر او اجازې ته سترګي په لار و.
o براء بن عازب ویلي: د رسول الله صلی الله علیه وسلم د اصحابو له ډلې تر ټولو ړومبی مُصْعَب بن عُمَیر، بیا ابن أم مکتوم، ورپسې عمار، بلال او سعد رضي الله عنهم زموږ سیمي (مدینې) ته راغلل.
o د اصحابو هجرت آسانه او له ګواښونو تش نه و، بلکي دا یو ډېر سخت او له بلها کړاوونو ډک خو نهایت مبارک سفر و، قریشو د اصحابو د هجرت پر وړاندي ډول - ډول خنډونه او مشکلات راولاړول.
o ابو سلمه بن عبدالاسد، عامر بن ربیعه او مېرمني یې لیلی بنت ابي حَثْمَةَ او بنو جحش مدینې ته هجرت وکړ.
عمر رضي الله عنه هم په پټه هجرت کوي
o عمر بن خطاب د شپې په پټه هجرت وکړ، عیاش بن ابي ربیعه او هشام بن عاص یې ملګري وو. دا خبره ابن اسحاق په صحیح اسناد سره خپل سیرت کي یاده کړې ده.
o دا خبره چي وایي عمر بن خطاب رضي الله عنه په ښکاره هجرت کړی او مدینې ته له روانېدو مخکي یې ویلي: که څوک غواړي مور یې بوره او یا یې اولادونه یتیمان شي، نو زما مخي ته دي راشي، په یوه کمزوري او ناثابت روایت کي راغلې ده.
o د عقبې د دوهم بیعت دوې میاشتي لا نه وې پوره شوي چي اکثریت مسلمانانو مدینې ته هجرت وکړ، په مکه کي له رسول الله صلی الله علیه وسلم، ابوبکر، د دوی دواړو له کورنیو او له هغو مؤمنانو پرته چي د هجرت وس یې نه درلود، نور مسلمانان نه وو پاتي شوي.
o رسول الله صلی الله علیه وسلم باوري شو او وې لیدل چي له یو شمېر هغو مسلمانانو پرته چي یا د مشرکینو له خوا بندیان وو، یا ناروغان او ناتوانه وو، نور ټول اصحاب مدینې ته مهاجر شول.
ابوبکر رضي الله عنه د هجرت اجازه غواړي
o ابوبکر صدیق به ډېر ځله له رسول الله صلی الله علیه وسلم نه د هجرت اجازه غوښته، رسول الله صلی الله علیه وسلم به ورته فرمایل: «لا تَعْجَلْ، لَعَلَّ اللهَ یَجْعَلُ لَکَ صَاحِباً». بیړه مه کوه، کیدی شي الله تعالی دي (غوره) ملګری په نصیب کړي.
نبي صلی الله علیه وسلم ته د هجرت اجازه
o د الله تعالی له لوري رسول صلی الله علیه وسلم ته د هجرت اجازه او امر وشو او تقدیر دا و چي ابوبکر صدیق رضي الله عنه به یې د دې ستر او تاریخي سفر (هجرت) ملګری هم وي.
o نبي صلی الله علیه وسلم خپل خاص ملګری ابوبکر د هجرت له مسألې خبر کړ او ورته وې ویل چي دی به یې هم ملګری وي، نو ابوبکر صدیق رضي الله عنه دوې اوښي، یوه د نبي صلی الله علیه وسلم او بله د ځان له پاره برابري کړې.
نور بیا...
www.taleemulislam.net
ورته ليکنې:
تبصره
